Жақсы сөз

Жақсы сөз – көпшік қойып мақтау емес,

Әдептен, ұяттан да аттау емес.

Жүрегіңнің жылуын ақ жарылған

Шым бүркеп, ішке бүгіп сақтау емес.

Жақсы сөз – аққу-сезім балапаны,

Ып-ыстық ізгі ұғымның алақаны.

Көңілден көлеңкені қуып шығар –

Нұр шашқан шұғылалы дала таңы.

Жақсы сөз – сара көңіл аңғарғаны,

Сүйсініп, мейірленіп таңғалғаны.

Емдейді ол жұлынды да, жүйкені де,

Жота, жон жадыратып бал бармағы.

Жақсы сөз із түсірсе зердеде ояу,

Қай-қашан көңілге дәз салмас қаяу.

Құлағын көп бұраймын зейілімнің,

Қалма деп парасаттан қара жаяу.