Ел нышан

Апталған алтындай шұғылалы шаңырақ,
Төбеде жайнайды Күн Сәуле жамырап…
Дейтіндей Елтаңба егемен Еліме:
– Бас қамшы, қанатты арғымақ аңырат!

Шаңырақ шайқалтпас уық та,
Кереге, босаға – Өзіміз.
Ант айтсақ, адалмыз әр сөзге,
Қалтқысыз қырағы Көзіміз.

Әр жанар, әр көңіл пейілді, мейірлі,
Шолады самал жел, саумал көл өңірді.
Осы елдің нышаны – тұп-тұнық Көк Туы
Меңзейді алысты – болашақ өмірді.

Ұстасам қолыма Көк Туды,
Кернейді қуатым бойымда.
Отандық ерліктей, өрліктей.
Борышты молайтып мойынға.

Бастайтын ерлік іс: еңбекке, ерлікке,
Үндейтін достыққа, ынтымақ, бірлікке.
Бастырмас сырт жауды қарыс жер Еліне,
Сыры іште Тау Барыс болмақшы ендікте.

Ән ұран – Асқақ үн ел жайлы,
Оны айтсам – қан бойда тасады.
Өтеді көз алдан Отанның
Самсаған Ұланы – жасағы.

© Естеу Нүсіпбеков

Ұнаса, бөлісе отырыңыз

Добавить комментарий

Ваш адрес email не будет опубликован. Обязательные поля помечены *

5 × 1 =